දෙහිවල ජාතික සත්වෝද්යානයේ සිටි ඇනකොණ්ඩා වර්ගයේ පිඹුරෙකු අතුරුදන්වී ඇති බවට දෙහිවල ජාතික සත්වෝද්යානයේ නියෝජ්ය අධ්යක්ෂක හේමන්ත සමරසේකර මහතා පවසයි.
ඔහු සඳහන් කළේ මේ සම්බන්ධයෙන් දෙහිවල පොලීසියටද පැමිණිල්ලක් කර තිබෙන බවයි.
පසුගිය 07 වන ඉරිදා සිට මෙම ඇනකොන්ඩා පැටවා අතුරුදන්වී ඇති බවත් එම ඇනකොණ්ඩා සොයා මේ වන විට පොලීසිය සහ සත්වොද්යානයේ කණ්ඩායමක් විසින් පරීක්ෂණ ආරම්භ කර තිබෙන බවද නියෝජ්ය අධ්යක්ෂවරයා පැවසීය.
සත්වෝද්යානයේ උරග උයනේ වීදුරු ආවරණයක් සහිත කූඩුවක මෙම සත්වයා රඳවා සිට තිබේ.
කහ ඇනකොණ්ඩා යනුවෙන් හඳුන්වන මෙම ඇනකොණ්ඩා පැටවා කිසිවෙකු විසින් පැහැරගෙන ගියාද යන්න මෙතෙක් නිෂ්චිතව තහවුරු කරගෙන නොමැත.
සත්වෝද්යාන බලධාරීන් විසින් උරග උයන තුළ නිරෝධායනය සඳහා යොමුකර සිටියදී එම කහ ඇනකොණ්ඩා පැටවා අතුරුදන් වී තිබෙනවා.
වාර්තා වන පරිදි, අතුරුදන් වූ මෙම පැටවා දෙහිවල සත්වෝද්යානය සතුව සිටි ලංකාවේ සිටි එකම කහ ඇනකොණ්ඩා පැටවායි.
ඇනකොණ්ඩා විෂ රහිත පිඹුරු වර්ගයකට අයිති වන සත්වයෙකු නිසා එම සර්පයාගෙන් කිසිවෙකුටත් හානියක් සිදු නොවන බවද නියෝජ්ය අධ්යක්ෂකවරයා පෙන්වා දෙනවා.
අතුරුදහන් වනවිට අඩි එකහමාරක් පමණ දිග එම ඇනකොණ්ඩා සර්පයා අඩි 12ක් පමණ දිගකට විශාල වන බව නියෝජ්ය අධ්යක්ෂකවරයා ප්රකාශ කරනවා.
ඔහු කියා සිටියේ එම ඇනකොණ්ඩා සර්පයා දකුණු ඇමරිකාව නිජබිම කරගත් ලොව බරින් වැඩිම සර්ප විශේෂයක් බවයි
✅✅✅✅✅✅✅